Italia frena ndaj turizmit masiv, vendosen kufizime në ishullin e Kaprit
Që nga sezoni i ardhshëm veror, ishulli i Kaprit do të lejojë vetëm grupe turistësh deri në 40 persona dhe ndalon altoparlantët në ture për të ulur zhurmën dhe mbingarkesën.
Rregulla më të rrepta për grupet turistike
Duke nisur nga sezoni i ardhshëm veror në ishullin mesdhetar të Kaprit, në Gjirin e Napolit, do të hyjnë në fuqi masa të reja për menaxhimin e turizmit. Sipas agjencisë së lajmeve Ansa, vetëm grupet e organizuara deri në 40 persona do të lejohen të zbresin në breg. Këshilli bashkiak i ishullit i miratoi njëzëri rregulloret përkatëse, në përpjekje për të frenuar fluksin e madh të vizitorëve.
Rregullat e reja parashikojnë gjithashtu që shoqëruesit e grupeve me më shumë se 20 persona nuk do të lejohen të përdorin altoparlantë gjatë tureve në qytetin kryesor të Kaprit. Në vend të tyre, komunikimi me turistët do të bëhet përmes kufjeve me radio, me qëllim reduktimin e zhurmës dhe shqetësimeve për banorët vendas dhe vizitorët e tjerë.
Identifikim i ri për guidat dhe kontroll më i madh në rrugë
Në të ardhmen, drejtuesit e grupeve turistike do të identifikohen me një kartelë të varur në qafë dhe nuk do të lejohen më të tërheqin vëmendjen me çadra apo shenja të tjera të dukshme. Ata do të kenë detyrimin të sigurojnë që grupet të qëndrojnë së bashku, të jenë të sigurta dhe të mos zënë hapësira të mëdha në rrugët dhe sheshet e qytetit.
Presion i madh mbi një ishull të vogël
Kapri është një nga destinacionet më të njohura të pushimeve në Itali, i famshëm për vilat me mure të bardha, bregdetin shkëmbor me gjire piktoreske dhe hotelet luksoze. Në sezonin kulmor, numri i vizitorëve arrin deri në 50,000 në ditë, ndërkohë që ishulli ka vetëm rreth 13,000 banorë.
Portet, monumentet historike dhe pikat panoramike mbipopullohen rregullisht gjatë verës, duke krijuar presion të vazhdueshëm mbi infrastrukturën dhe komunitetin lokal. Lorenzo Coppola, kreu i shoqatës së tregtisë Ascom Confcommercio Capri, i cilësoi kufizimet si një “mjet të domosdoshëm për lehtësimin e barrës” në zonat e mbingarkuara, me synimin për t’u rikthyer rrugëve dhe trotuareve hapësirën që u takon.
